A Deputación da Coruña inviste 3,5 millóns de euros para crear máis de 400 empregos nos concellos da provincia

Foto (Arquivo). Formoso durante unha presentación do Plan de Emprego Local

A Deputación da Coruña publica hoxe no Boletín Oficial da Provincia a resolución de concesión das axudas do programa PEL-Concellos, a liña do Plan de Emprego Local (PEL) que lles permite aos concellos coruñeses contratar persoas desempregadas para a prestación de servizos básicos municipais.

Este ano, un total de 92 concellos coruñeses recibirán 3.547.620 euros para contratar a máis de 400 persoas durante un período máximo de un ano.

O presidente da Deputación, Valentín González Formoso, destacou o "carácter social" desta liña do PEL, que "prima a contratación de persoas con especiais dificultades de inserción laboral" e que supón tamén "unha aposta polo mundo rural", xa que o 84% dos fondos (2.964.193 €) se conceden a municipios de menos de 20.000 habitantes, proporcionando aos concellos máis pequenos os medios humanos necesarios para poder ofrecer servizos municipais de calidade. "Cremos no rural e con este programa axudamos a crear postos de traballo e a mellorar os servizos públicos que os concellos ofrecen á veciñanza", afirmou o presidente.

As persoas con maior dificultade para atopar traballo serán a prioridade

Á hora de seleccionar o persoal, os concellos deberán aplicar criterios sociais e dar prioridade á inserción de persoas que pertenzan a colectivos con maiores dificultades para acceder a un posto de traballo.

Así pois, beneficiarase a persoas maiores de 45 anos, desempregadas de longa duración, persoas cun grao de discapacidade igual ou superior ao 33%, pertencentes a fogares con todos os seus membros en paro, vítimas de violencia de xénero, en risco de exclusión laboral ou mulleres. Ademais, dentro destes colectivos, os concellos primarán a aquelas persoas que  remataran favorablemente programas de capacitación, formación e integración no mundo laboral organizados ou financiados polas administracións públicas.

Entre 19.000 e 75.000 euros por concello

Os importes que reciben os concellos de menos de 50.000 habitantes varían en función da porcentaxe resultante de dividir o número de persoas desempregadas en cada concello entre o número total de persoas desempregadas nos concellos de menos de 50.000 habitantes, oscilando as contías entre os 19.000 e os 52.000 euros. Pola súa banda, os concellos da Coruña, Ferrol e Santiago de Compostela optan a unha contía única de 75.000 euros.

Os operarios e operarias, deberán ser contratados cunha xornada mínima semanal de 25 horas. As axudas destinaranse a sufragar os custos salariais, de Seguridade Social, as indemnizacións por fin de contrato e a formación en materia de prevención de riscos laborais das novas contratacións.

Desde a súa posta en funcionamento, a liña de PEL-Concellos facilitou unha oportunidade laboral a máis de 3.741 persoas desempregadas da provincia.

Aberta a solicitude das liñas PEL para peme, emprendedores e autónomos

PEL-Concellos é unha das liñas PEL, que contempla tamén  axudas para a contratación de persoal en peme e microempresas, para investimentos que melloren a competitividade dos pequenos negocios, para apoiar o emprendemento e para sufragar ás cotas á Seguridade Social dos profesionais autónomos da provincia da Coruña.

A convocatoria para acceder a estas outras liñas de axudas do PEL para peme, microempresas, emprendedores e traballadores autónomos está aberta ata o 22 de febreiro.

Máis información en www.dacoruna.gal e www.pel.gal

SOLICITUDES PEL-CONCELLOS 2024 CONCEDIDAS

1 3

Fotogalería

Foto (Arquivo). Formoso durante unha presentación do Plan de Emprego Local