A I Copa de fútbol afeccionado Deputación da Coruña celebrarase en Oleiros no mes de xuño
Participarán os equipos da categoría masculina e feminina gañadores das Copas oficiais da Federación Galega de Fútbol da provincia da Coruña
O campionato repartirá 28.000 euros en premios e os equipos gañadores participarán na Supercopa Deputación cos gañadores das outras tres provincias.
O vencedor da Supercopa Deputación disputará a fase previa da Copa do Rey
A I edición da Copa de fútbol afeccionado Deputación da Coruña reunirá no mes de xuño en Oleiros o mellor do fútbol afeccionado coruñés para disputar este campionato
Participarán na competición os equipos da categoría afeccionados, masculina e feminina, gañadores das Copas oficiais da Federación Galega de Fútbol na provincia da Coruña, que son a Copa A Coruña, Copa Costa da Morte, Copa Ferrol e a Copa Sar.
O deputado de Deportes, Antonio Leira, destacou que a competición "ten como obxectivo apoiar ao fútbol modesto da provincia da Coruña a través dun torneo que reúne os gañadores das copas da provincia".
A competición terá lugar no mes de xuño en Oleiros. As semifinais celebraranse o domingo 16 e as grandes finais serán o sábado 22.
O torneo disputarase mediante un sistema de eliminatorias a un só encontro, celebrándose en dúas xornadas en formato de sede única, disputándose todos os partidos de cada xornada nun mesmo campo. En caso de empate, incluída a final, resolverase a igualdade a través dunha quenda de penaltis.
Toda a información, resultados, incidencias e notificacións desta competición realizaranse a través da páxina web www.futgal.es e a intranet da propia federación nunha xanela específica para a I Copa de Fútbol Afeccionado Deputación da Coruña.
Recibirán un trofeo os equipos campións e subcampións, masculino e feminino. A entidade provincial destinará un total de 28.000 euros en premios aos equipos participantes recibindo 5.000 euros os campións, 4.000 euros os subcampións, 3.000 euros os terceiros clasificados e 2.000 euros os cuartos clasificados.
Os gañadores deste campionato conseguirán praza para a Supercopa Deputación, que disputarán cos gañadores das outras competicións homólogas que se disputan nas provincias de Lugo, Pontevedra e Ourense. O vencedor da Supercopa Deputación participará na fase previa da Copa do Rey de fútbol.
As entradas para o público afeccionado serán de balde para todos os encontros.