Páxinas
Novas

Novas

Image Slider
Unha das actividades do programa "Coa lingua fora"
Páxinas suxeridas

A Deputación da Coruña aumenta o seu apoio á literatura infantil e xuvenil

01 de Abril de 2017

A Área de Cultura da Deputación da Coruña aumenta neste ano o seu apoio á literatura infantil e xuvenil e, ademais da convocatoria do premio Raíña Lupa, inclúe no premio Castelao de Banda Deseñada unha nova modalidade para público infantil que incorporará un programa de actividades organizadas por Gálix.

Coincidindo co Día Internacional da Literatura Infantil e Xuvenil que se conmemora o 2 de abril, a Área de Cultura da Deputación da Coruña anuncia a colaboración coa Asociación Galega do Libro Infantil e Xuvenil (GÁLIX) para a organización dun programa de actividades arredor da nova modalidade do premio Castelao de Banda Deseñada para público infantil que se convoca este ano por vez primeira.

Por proposta de GÁLIX, que parabenizou a decisión da Deputación de promover a publicación de banda deseñada para o novo público lector, organizaranse distintas actividades encamiñadas a promover e difundir un xénero con escasa presenza na literatura galega. Profesionais do sector animarán a convocatoria do premio e tamén a súa posterior publicación, co obxectivo de gañar novos lectores para a banda deseñada en idades máis novas. A iniciativa de Gálix responde á necesidade de "dar visibilidade a esta tipoloxía de cómic, tan necesaria dentro da produción galega e que levamos anos botando de menos", segundo indican na súa proposta.

O Premio "Castelao" de Banda Deseñada chega á súa XII edición incorporando por vez primeira unha nova modalidade especialmente dirixida á infancia. O premio, ao igual que a modalidade para todo tipo de público lector, está dotado con 6.500 € e o prazo para presentación das obras estará aberto até o vindeiro 15 de xuño.

Esta nova convocatoria para lectores e lectoras de menor idade súmase ao Premio Raíña Lupa de Literatura Infantil e Xuvenil que chega neste ano á súa XI edición. Dotado tamén con 6.500 €, o prazo de presentación de traballos está aberto até o día 1 de xuño.