A natureza e medio natural é un tema clave e motivo de preocupación hoxe en día, por iso é importante que os máis mozos coñezan e se sensibilicen con esta materia.

Nesta materia a Unión Europea desenvolve amplamente a súa actividade e ademais, na web da Comisión Europea, dedica un apartado para os mozos onde recolle información centrada en catro piares básicos: aire, auga, residuos e natureza.

Se estás interesado en saber que fai a Unión Europea para loitar contra estes problemas e o que podes facer ti, navega polo sitio web da Comisión Europea de Medio Natural para mozos, no que encontrarás a preocupación da UE en temas relativos á calidade do aire, para a mellora da capa de ozono; tamén a preservación da auga, como elemento esencial para a vida; o tratamento dos residuos, facendo fincapé na necesidade da reciclaxe e novas vías de solución; e a natureza, coa súa flora e fauna alertando da necesidade de protexer as especies en perigo de extinción e do medio natural.

Dende o espazo Biodiver, da Fundación Biodiversidade, ofrécese aos mozos e nenos a oportunidade de coñecer máis sobre o medio que os arrodea, a través dos artigos de información, así como de contos para os máis pequenos, tamén hai un espazo dedicado aos xogos sobre os temas tratados e con diferentes medios audiovisuais.

Ponse a disposición da mocidade diferentes espazos web interactivos, relacionados co ámbito do medio natural e en diferentes linguas, así temos o espazo KidsRgreen, un sitio web en inglés, ou o portal francés L'Ecole agit, son portais pensados para os mozos que queiran explorar e descubrir os secretos do mundo no que vivimos, con diferentes recursos audiovisuais e documentais sobre o medio natural, así como un apartado de xogos sobre como aproveitar os recursos enerxéticos para un desenvolvemento sostible da natureza. Tamén pon a disposición da xuventude información sobre diferentes zonas do planeta, como do polo norte, desertos, áreas tropicais, entre outras.

Se o que buscas é un espazo dedicado a novas sobre a natureza, atoparalo en Nature Notice. Neste espazo están a disposición dos máis novos diferentes artigos que conteñen novas sobre o medio natural e biodiversidade, así como recursos lexislativos e educativos.

Outro recurso web para coñecer máis acerca das políticas comunitarias é o da Axencia Europea de Medio Natural, ademais poderás visitar a sección de educación, onde se ofrece a posibilidade aos mozos de xogar e desenvolver os seus coñecementos nestes temas.