O programa fomentará unha investigación nas fronteiras do coñecemento" de rango mundial. A expresión "nas fronteiras do coñecemento" reflicte unha nova forma de entender a investigación básica. Por un lado, denota que a investigación básica en ciencia e tecnoloxía é de importancia fundamental para o benestar económico e social e, por outro, que a investigación nas fronteiras actuais do coñecemento, e máis alá delas, é unha empresa intrinsecamente arriscada, que avanza nos ámbitos de investigación novos e que formulan un maior reto, e que se caracteriza pola ausencia de límites interdisciplinarios.

O programa apoiará proxectos únicos que poderán realizarse en calquera campo de investigación científica e tecnolóxica básica comprendida sempre no ámbito da investigación comunitaria correspondente ao presente Programa marco, o que inclúe a enxeñaría, as ciencias socioeconómicas e as humanidades. Cando proceda, poderán terse en conta temas de investigación específicos ou grupos destinatarios concretos (por exemplo, investigadores das novas xeracións/equipos novos), de acordo cos obxectivos do programa e as esixencias dunha execución eficiente. Prestarase unha atención especial aos ámbitos emerxentes ou de rápido crecemento nas fronteiras do coñecemento e na interface entre disciplinas diferentes.

Seguirase un enfoque "impulsado polos investigadores". Isto significa que o programa apoiará proxectos realizados por investigadores sobre temas elixidos por eles dentro do marco fixado polas convocatorias de propostas. As propostas avaliaranse unicamente a partir do criterio de excelencia, xulgada mediante avaliación por homólogos, tendo en conta a excelencia de grupos novos, investigadores das novas xeracións e equipos xa recoñecidos, e prestando especial atención a aquelas propostas que presenten un marcado carácter pioneiro e leven aparellado un risco científico elevado.